蝸牛路

以下轉自蘋果日報：

悶悶不樂

2011年06月02日

在新加坡金沙酒店坐的士去機場，司機問：「我地有三個 terminal，你去邊個？」一言驚醒，唔知係邊個噃，只能同佢講：「國泰航空」。司機話：「即係 terminal 1啦。」路上交通暢順，唔駛二十分鐘就到，的士費冇附加費噃，二十坡紙有找。樟宜機場雖然有起碼三十年歷史，但不斷擴展，恒常與香港赤鱲角機場爭奪世界排名第一，絕不落後，回心一諗，人地已有三個 terminal，而香港機場第三條跑道先至話將會進行諮詢，十年後都唔知可以落成未，或者又會因為有一位東涌婆婆反對而起唔成呢！ 坐在機上，回想 PB「新加坡贏晒」之言，悶悶不樂一個鐘頭，要睇機上早一日嘅香港報紙解悶。新加坡嘅全國地區規劃發展做得非常好，由 URA負責，當地朋友曾帶左丁山到 URA總部參觀規劃模型，留下深刻印象，睇模型就知道新加坡商業中心區會不斷擴展，現有填海地皮（金沙酒店以東）大過我地西九龍， Marina Bay以南繼續填海，新型甲級寫字樓供應源源不絕，我地嘅中環就乜都冇，殘舊中環街市都話要保留，拆政府合署西翼又有人反對，新寫字樓究竟從何而來？

西九龍其實可以興建文娛藝術區與甲級寫字樓嘅，做乜鬼要起住宅吖，將來嘅西九豪宅只會俾內地人買入，跟住丟空，但興建寫字樓嘅話，反可吸引外資及中資在港開設辦公室，增加本地人就業機會。目前好多八十後、九十後埋怨欠缺機會，可以話，如果香港一股反增長、反基建設立之風蔓延嘅話，最受打擊嘅就係八十後、九十後，最得益嘅就係現在嘅有錢人。一啲上咗岸嘅中年專業人士帶動年青人反乜反物，其實最終會破壞年青人前途，佢地就冇所謂，繼續印印腳啫。年青人在一個停滯不前嘅社會，最冇機會，西班牙嘅失業率高達 21%，年青人失業率達 45%，試問有乜希望？左丁山好希望香港有藍天白雲，空氣清如自己嘅大學年代或者阿爸細個在荔枝角泳灘游泳時代，假使當日可以司法覆核，唔准美孚新邨興建，破壞附近海灘嘅話，該處環境會好好多，但美孚新邨居民會住咗去邊？

（左丁山）

雖然從不欣賞此君，但是香港現在的處境就是如此，人家說的是有道理嘛。政府無能，既沒有長遠規劃也沒有承擔；政客無恥，利用一個阿婆玩法律遊戲拉停香港正正需要的基建工程，多少人被犧牲了機會和飯碗而不自知，搞個最低工資搞出個大頭佛無視被逼失業的受害者還要邀功，開會拋兩隻香蕉然後理直氣壯和朋友下午茶順手騙個出席率，輪流被揭涉嫌房屋僭建不但不怕其身不正反而大把藉口；選民無腦，選一群如此這般政客。「三無」香港，有何前途？